Балам сымбатты болып өссе демейтін ана жоқ. Осы ниетпен ол баланың аяғын жөргектегенде болсын, бөлегенде болсын түп-түзу етіп қысып қояды. Ортапед дәрігерлер мұндайда баланың тізесі бүгіліп, табиғи еркін қалпында жатуы үшін аяғының арасына жұмсақ жаялық салып бөлеген дұрыс деп кеңес береді.
Баланың аяғы негізінен ит ауруынан қисаяды. Ит болған баланың салқын тигіш, денесі болбыр бос, терісі бозаң тартып тұратыны белгілі. Ана сүтімен коректенген баланың итке шалдығу қатері кемірек. Ал қолдан тамақтандырылатындай болса, педиатрдың ақыл-кеңесінің бәріне мұқият болу керек.
Екі-үш айдан бастап баланы күніне бір жарым сағаттан екі-үш сағатқа дейін таза ауада ұйықтату керек (әрине, желді, аязды күндерде абайламаса болмайды). Күн сәулесі-"иттің" жауы. Бірақ жазда күнге екі-үш минут қана ұстап, былайғы уақытта көлеңкеде ұйқтату керек.
Баланың бас бітіміне көңіл бөлмесе болмайды. Ылғи шалқасынан, не бір қырынан жататын болса, қатпаған сүйек қисайып кетуі мүмкін. Баланың шашының дұрыс өспеуі, терлегіштігі, қатты дыбыстан селк етіп шошу-ит ауруының алғашқы нышандары. Дереу дәрігерге бару керек. Мұндайда әдетте Д дәрумені (витамині) беріледі. Ол дәрігерлердің айтқан мөлшерінен әсте кемітпей де, асырмай да беру керек болады. Тез түзеймін деп артық ішкізу қауіпті екені есіңізде болсын.
Баланың бабы көп. Әйтсе де ана өзінің күтім-бабын да ұмытпауы керек. Бар қамыңыз бала болып өзіңіз жүдесеңіз, мұның балаға да әсері болатыны айтпаса да белгілі.
|
