 Нұрсұлтан Назарбаев барша мұсылман қауымын Құрбан айт мерекесімен құттықтады, деп хабарлайды Ақорданың баспасөз қызметі.«Бұл - шын мәнінде, адамдар мен халықты біріктіретін, барлық мұсылман үшін ұлық мереке. Осы күні отбасы болып жиылып, бір-біріне қонаққа барып, жақын араласу дәстүрге айналған. Құрбан айтта әлемнің барша мұсылмандары шынайы ой-ниетімен Жаратқанға жақындай түседі. Ислам әрдайым ізгілікке үндейтін және шақыратын бейбіт дін саналады. Ол бөлінуге емес, бірігуге шақырады. Құранда мұсылман сөзімен де, ісімен де ешкімге зиянын тигізбеуі тиіс деп айтылған», - деді Мемлекет басшысы.Қазақстан Президенті қазақстандықтар тәуелсіздіктің арқасында дінге қайтадан бет бұрғанын атап көрсетті.«Ислам бірнеше жүзжылдықтар бойына халқымыздың негізгі діні болып саналады. Республика егемендік алған уақыттан бері 2300-ден астам мешіт салынды. Бүгінде біз елімізді өркендетуге және әлемге кеңінен танытуға ұмтылып отырмыз. Барша қазақстандықтарға үміттері мен тілектерінің орындалуын, сондай-ақ елімізге өсіп-өркендеу мен береке-бірлік тілеймін», - деді Нұрсұлтан Назарбаев.
muftyat.kz
|
