(Қазақстан мұсылмандары діни басқармасының сараптау коммиссиясы мақұлдаған «Күнтізбе-2010, Алматы, «Көкжиек» баспасынан шыққан еңбектен алынған)
«Садақа-пәле-жаладан аман сақтайды» деп сену. Жалпы, мұсылмандардың садақа беруі Құран Кәрімде бірнеше мәрте баяндалған. Сондықтан мұсылман қазақ халқы бұл әмірді өздеріне дәстүр етіп, әрдайым садақа беріп, бір-біріне жәрдем еткен. Рақымды Жаратушының әрбір әмірінің төңірегінде адамдардың пайдасына шешілетін хикмет-сырлар бар. Сондай-ақ садақаның да біз білетін-білмейтін көптеген пайдалары бары анық. Сондай пайдаларының бірін Пайғамбарымыз: «Садақа беруге асығыңыз. Себебі басқа келетін бәле садақадан оза алмайды»,-деп үйреткен Яғни, садақа басқа келейін деп тұрған бәле-қатердің жолына тосқауыл болады. Міне, Пайғамбарымыздың (саллаллаһу алейһи уә сәлләм) үйреткен тағылымымен халқымыз садақаның осындай қасиетіне сеніп, Аллаһ жолында адамдарға садақа беруге еш аянбаған. Болашақтан сөз қозғағанда «Құдай қаласа» деп қосып айту. Бұл жайында Д. Кішібеков: «Қазақ еш уақытта пәлен жұмыс істеймін, не анда барамын немесе келемін деп айтпаған. Оны да «Құдай қаласа» үйтемін, барамын, не келемін деген»,-дейді. «Құдай қаласа» сөзінің арабша баламасы-«иншаллаһ».
|
