Оразақын Асқар
«Дүние ойлап тұрсам терең теңіз...»
Дүние ойлап тұрсам терең теңіз,
Жақсылық, жамандықпен болады егіз.
Басқайсың аяғыңды аңдап-аңдап,
Болғанда досың екеу, дұшпан сегіз.
Дүние батқан күндей бітеді өмір,
Мұжылып тау таусылып, тозар темір.
Жеке өмір желде жанған от сияқты
Қалатын орынында күл мен көмір.
Дүниеде қалаған тас, қыш қалады,
Елге еткен адал еңбек, іс қалады.
Тек ұзын өмір деген тумағанға,
Туғанға өмір дереу қысқарады.
Арманға жетер түбі арымаған,
Ар үшін аямайды жанын адам.
Дүниеде жан аямай жалын кешіп,
Жадырап табар сүйген жарын адам.
|
