Қартаймаудың амалы табылды бірақ оның қауіпті тұстары да бар сияқты. Қазақстан өткен маусым айында әлемдегі жасушалық технологиялардың негізіндегі наномедицинаға ресми түрде мүшелікке өткен болатын. Сөйтіп біздің елдің денсаулық сақтаушылары жуырда американдық Мейнард Хоу басқаратын «Стамедика Сэлл Техн., Инк» компаниясымен бес жылға арналған жоба бойынша жұмыс істеуді бастады. Үш кезеңнен тұратын бұл жоба бойынша біздің ел де науқастарды діңдік жасуша (стволовые клетки) арқылы емдеуді қолға алмақ.
Діңдік жасуша дегеніміз не? Діңдік жасуша әйел мен ер адамның жұмыртқа жасушасы қосылған кезде пайда болады. Яғни ұрықтанудан кейінгі, болашақ адам пайда болардан алдыңғы саты. Бұл жасушада болашақ ағза, оның құрылысы мен дамуы туралы бүкіл ақпарат сақталады. Эмбрионның дәл осы бұзылмаған кезінде онда бүкіл гендік: жүйке, ми, бұлшық ет, сүйек құрылымы, жалпы болашақ адамға қатысты барлық ақпарат болады. Онымен түрлі ауыр науқастарды емдейді.
Ақпарат беттеріндегі мәліметтерге сенсек, діңдік жасуша арқылы емделгісі келген адамға донор ретінде өз жасушалары қолданылуы керек екен. Сонда жасуша ағзаға тез сіңіп кететін көрінеді, ал егер ауруға бөтеннен алынған діңдік жасуша енгізілетін болса, адамның бойында жат дүниені қабылдау үшін түрлі реакциялар жүріп, соңы түрлі ісік (рак) ауруларын тудыратын көрінеді. Егер осы мәлімет рас болса, американдықтар халықаралық нарыққа патенттелген өнім шығару үшін өздері сырттан әкелген жасушаларымен Қазақстан халқын сынақ құралына айналдырмақ деген күдік туындайды. Сондықтан біздің денсаулық сақшылары әрбір денсаулық сақшылары әрбір қадамын байқап-байқап басса болар еді. Жаңа технология жақсы дүние болғанмен, болашағы бұлыңғыр болып тұр ғой...
Жанна Иманқұлова.
(материал қысқартылып алынды «Ауырмаңыз!», №11 қараша 2010 ж)
|
