Баспалдақтан көтеріліп не түсіп келе жатып қарсы кездескенде әйелдің жолдың оң жағымен жүру ережесін сақтап оң жаққа ығысуы міндетті емес. Таяныш бар жағымен, одан ұстап не таянып жүру әйелдің жолы.
Аяқты айқастыра салып отыруда да әдептен асуға болмайды. Мұндайда аяқты жоғары ұстау, тізені құшақтап отыру да әдепсіздік болып көрінуі мүмкін. Креслоның балдағына жайғасу тек әбден аралас-құралас болған, өзімсінген жағдайда ғана жарасады. Сөйлескенде қолы-басы бірге сөйлеген, әрине, ерсі; мұндайда әсіресе көп адам өздері де байқамайтын, кімге де болса ұнамайтын дағды-сұқ саусақты безеп сөйлеу.
Жұрттың алдында есінеудің ыңғайсыз екенін кім де болсын біледі. Мұндайда бір есте болатыны, адам іштен есінеймін деп ықылық тигізіп алатын жағдай жиі болады.
Біреумен әңгімелесіп тұрғанда, топ ішінде галстугыңызды, түймеңізді ұстағыштап тұрған дұрыс емес, ал қарсы алдыңыздағы адамның галстугы не түймесіне қол созу тіпті ерсі болып көрінеді.
|
