Алуан түрлі әдебиеттерде дұрыс тамақтанудың пайдасы жайлы құнды пікірлер бар. Солардың бірінде былай делінеді. Алла Тағала әуел баста жер-дүниені жаратқанда адам өміріне қажеттінің бәрін де қоса жаратқан. Көкте, жерде, жер астында, суда адамға қажеттінің бәрі табылады. Ас-ауқат, сусын-шырын жағы да түгел жеткілікті. Аң, құс, жеміс-жидек өнімдері түгелге жуық адамның қорегіне жарайды.
Мал еті, құс еті, балық еті, әр түрлі жеміс, миуа өнімдері-адал ас, ауқат, сусын екені мәлім.
Бірақ Алла Тағаламыз өзінің елшісі Мұхаммед ғалейһис салам арқылы қасиетті Құранда ескерткен, мұсылман баласының ішіп-жеуіне тыйым салынған арам нәрселер де бар. Олар: 1) доңыз еті; 2) өлексе; 3) қан; 4) "бисмиллә" деп сойылмаған кез келген малдың, аңның еті.
Сол секілді арыстан, жолбарыс, қасқыр, қарсақ секілді жыртқыш аңдардың, бүркіт, қарға, сауысқан секілді жыртқыш құстардың тісі мен тырнағы тиіп, паршалаған хауаннаттардың етін жеуге тыйым салынады.
Өлексені тамаққа пайдалануға болмайды. Бірақ арам өлген аң мен малдың терісін, мүйізін, сүйегін, жүнін тұрмыс қажетін өтеуге жұмсауға рұқсат етіледі. (Бұл турасында қаситетті Құранның "Бақара" сүресінде, 168-аят, 172-173-аят, "әл-Маида" сүресінде, 3-аят, "Әнғам" сүресінде, 145-аят айтылған).
|
