Үзілісте
Көп жердегідей Өскемен қаласының № 43 мектебінде де оқу жылы аяқталып келеді. Оның ішінде, әсіресе, бірінші сыныпқа әзірлік тобында оқып жүргендердің күнделікті өмірлері аса қызықты. Осында оқыйтын кішкене қызы Рәзияны күтіп алуға келген анасы Маржан мен топ мұғалімі Әлия апай балалардың үзілісінде күлкіге қарқ болды.
Қалай дейсіз ғой?
Маржан Рәзиядан әлдеқайда кіші үш жарым жастағы ұлы Ибрагимді мектепке ерте келген. Сол сынып есігі ашық кезінде ішке қарап тұрып, қолындағы әкесінің фотокамерасымен сыныптағыларды суретке түсіріп алмақшы болды. Өзі тіпті салмақты:
-Суретке түсіріп алайын ба?-деді шешесіне. Маржан сыныптағы мұғалім бұл тілекке қалай қарар екен дегендей Әлия апайға күлімсірей мойын бұрды. Әлия апай, балалар мінезіне қанық ұстаз өңінде ешқандай күлкі ізі жоқ:
-Түсірсін,-деді...
Ибрагим түсірді... Осыдан кейін Әлия апайы:
-Фотограф аға, суретіңіз қашан дайын болады?-деп сұрағанда Ибрагим өте жауапты кейіппен бір ауыз сөз айтты:
-Ертең!-деді.
Ұстаз бен ана мәз болысып, күліскенде Ибрагим езу де тартқан жоқ...
... «Бала қылығы-бал» деген осы. Олардың мінез-құлқы әр қалай-ау...
М. Күркебайұлы
|
