 Тамырының өзіне тән хош иісі және ауыз күйдірерлік ащы дәмі, күрделі құрамды эфир майы бар. Сондай-ақ оның құрамында ащы гликозид-акорин, аскорбин қышқылы, иілік зат, шайыр, крахмал болады.
Емдік мақсатқа өсімдіктің тамыр сабағы мен жапырақтарын пайдаланады. Бұдан жасалған дәрілерді халық арасында қырқұлақ ауруына қарсы, эпидемиялы тырысқақ, грипп, сондай-ақ бөртпе сүзек кезінде қолданған, қазір де қолданады.
Иірдің сабағынан қайнатып қоймалжың затты суық суға қосып, ал кейде кептіріп ішеді, қажетті жағдайда дене сыртына да жағады.
Иірдің тамыр сабағынан жасалған препараттарды тәбет ашатын, асқазан-ішек жолының қызметін реттейтін дәрі ретінде де пайдалануға болады.
Оның тамыр сабағынан жасалған ұнтақты асқазан қыжылдап, бүйрек пен қуық қабынып ауырған кезде ішеді және оны тіс порошогына араластырып, тіс тазартуға да болады.
Шаштың түсуін тоқтату үшін иір препараттарын басқа жағады. Ол үшін иір тамыр сабағын, кәріқыз тамырын, қырмызы гүлін, құлмақ бүрін алады. Осылардан жасалған қоспаны 1 литр суға қайнатып, оны күнде жатар алдында басқа жағады.
|
