Әрбір мұсылман Құранды өзі ғана оқып үйреніп қоймай, оны бала-шағасына да үйретуге міндетті. Себебі пайғамбарымыз (саллаллаһу аләйһи уә сәлләм) хадис шарифте:
"Сіздердің ең жақсыларыңыз Құранды үйреніп, оны басқаларға үйреткен-деріңіз"-деген.
Құрансыз өмір бос, мәнсіз екендігін әрбір мұсылман жақсы түсінуі керек. Құран оқылмаған үйде, жерде, елде береке, тыныштық болмайтынын есте сақтау ләзім. Пайғамбарымыз (саллаллаһу аләйһи уә сәлләм) бұл туралы хадис шарифте былай дейді: "Үйлеріңізде Құран Кәрімді көп оқыңыздар. Себебі Құран оқылмаған үйде жақсылық, береке аз болады. Ондай үй-іші әрдайым қиыншылықта болады" Яғни ондай үйде тыныштық болмайды.
Дүниедегі еш нәрсе адам баласын Құрансыз бақытты ете алмайды. Отбасында тыныштық, татулықты тек Құран ғана бере алады. Әсіресе қазіргі заманда болып жатқан әлеуметтік құбылыстарға зер салсақ, отбасы мүшелері арасындағы түрлі араздасулар, келіспеушіліктер, ұрыс-керістердің көпшілігі дін жолын ұстанбайтын, Құран оқылмайтын үйлерде, отбасыларда болады. Құран оқылған үйде Аллаһ тағаланың шексіз мейірім, рахымы жауады.
Хазірет Пайғамбарымыз: "Бір үйде Құран оқылса, аспаннан періштелер енеді. Шайтандар қашады. Үй ішіне жақсылық, тыныштық енеді, жақсылық көп, жамандық аз болады. Бір үйде Құран оқылмаса, ол жерде шайтандар келеді, періштелер кірмейді, үй-ішіне тынышсыздық келеді, жақсылық азайып, жамандық көбейеді",-деген.
/Әбсаттар қажы Дербісәлі, Қасиетті Құран., 2008/
|
