(Қазақстанның еңбек сіңірген әртісі, опера әншісі Майра Мұхамедқызының «Мен өкініші жоқ әйелмін» деген сұхбатынан. Сұхбаттасқан А. Сапарбаева, «Жұлдыздар отбасы» журналы, қаңтар, 2010 жыл)
-Осынша жетістікке жетуіңіз бойыңыздағы қай қасиеттің арқасында мүмкін болды деп ойлайсыз?
-Еңбекқорлық және үнемі іздену деп білем. Қандай да бір нәрсені қатты қалап, армандасаңыз, армандап қана қоймай, сол жолда тынбай еңбектенсеңіз, оған жетпей қоймайсыз. Алла тағаланың кеңдігінде шек жоқ, кішкене ғана нәрсені сұрасаңыз, үйіп-төгіп береді. Бізді аяқтан тартатын жалқаулық. Мен бір қытай азаматын білетінмін. Жағдайы болмағандықтан, қоғамдық әжетхананың жанындағы бір тар бөлмеде ағылшынша оқып отыратын. Қанша адам әжетханағы кіріп-шығып жаттады. Әлгі жігітке ол жердің иісі де, жұрттың шуылы да сезілмеді. Өйткені, ол өзінің мақсатының түбіне бойлап кеткен. Қазір сол жігіт Швейцарияда тұрады. Үлкен бір ғылыми зерттеу жүргізіп, аты шыққан маман. Әжетхананың бұрышында сабақ оқып, күнде қытай кеспесімен қоректеніп жүрген сол жігіттің қазір ел қызыға қарайтындай жағдайы, білімі бар. «Егер сол қытайдың бойындағы рух менде болғанда, бүкіл әлемді бағындырар едім» деймін мен кейде.
«Майра Мұхамедқызы» дегенде, бүкіл әлем Қазақстанды танитын болса, менің арманымның орындалғаны. Мен бұған дейін тек қана опера орындай алатынымды көрсеттім. Баспалдаққа аяғымды енді салдым. Менің жұлдызды сәттерім әлі алда. Әлеуметтік жағдайым жақсарды, ешнәрсеге алаңдамайтын дәрежеге жеттім. Енді тек өнеріме көңіл бөлетін кез келді. Қолымнан не келетінін енді көрсететін боламын, Құдай қаласа.
|
