Қазақ апа, қарындасынан туған балаларды айрықша еркелеткен. Нағашысына жиен әрдайым батым болған. Жиені нағашысына «Қырық серкешімді алуға келдім»,-деп, арнайы нағашылап барады екен. Қазақта «нағашылап келдің бе?», жиендік жасайын деп жүрсің бе?» деген сөздер осындан қалған. «Қырық серкешін» даулап нағашылап барған жиен құр қайтпайды. Өзінің қалағанын (жалпы құны қырық серкештің құнынан аспаса) алып қайтады. Қазақта жиі айтылатын «жиеннің наласы қатты болады, сұрағанын беру керек», «жиенін ұрғанның қолы қалтырайды» деген сөздердің өзі жиеннің нағашысына еркіндігін, оның сұрағанын беру, ренжітпеу, ешқашан қандай жағдай болса да қатты сөз айтып, қол жұмсамау, үнемі бетінен қақпай еркелетіп жүру керектігін білдіреді. Сондықтан да болар жиен жүйрік ат, қыран бүркіт, құмай тазы, берен мылтық сияқты алғысы келіп, көңілі түскен бұйымтайын нағашысы берсе қолынан, бермесе жолынан алуға ерікті. Ол үшін нағашысы жиенінің алғанын даулап қазының, бидің алдына барса да, қазақ дәстүрінде жиенді айыптамаған.
|
