Белгілі дәрігер психотерапевт Владимир Леви адам жанының құпиясын көп зерттеген ғалым. Бақытты болудың, әркім өзін бақытты сезінудің аясы аса үлкен көрінеді. Ол ғылыми жұмысында мұның жеті амалын есімізге сақтап, күнделікті өмірімізде басшылыққа алайық.
1.Бақытты жандар өздері туралы «бақыттымын ба, жоқ па» деп ойланып жатпайды екен. Өз жүрегінің қалауымен өмір сүре береді.
2.Бақытты кісі өз мүмкіндігінің шегін біледі. Ол өзіне-өзі талап қойғанда да шамасына қарай, қолынан келетін іске талап қылады.
3.Бақытты адамның күнделікті өмірі де қызғылықты. Бұдан бақытты адам әрқашан думан-тойдың ортасында жүреді екен деген ұғым тумауы керек.
4.Бақытты адам өзін іштей кең ұстайды. Іштей кең болу, ішкі бостандық дегеніміз не, енді соған тоқталық. Бұл айналадағы белгілі бір адамдардың пікірінен қаймықпау, «кім не дейді екен» деп жалтақтамау, не істесе тек жақсылық жасауға міндетті болғандықтан ғана істеу емес, шын пейіліңмен ақтарыла көмектесуге ұмтылу; бұл-өз сөзің мен әрекетіңе әрқашан жауапкершілікті сезіну; бұл-өзгенің пікірін тыңдай білу.
5.Бақыттымын дейтін адамдар әрқашан біреуді кінәлауға дайын тұрмайды. Бұл оларда ашу, ыза, өкініш, үрей жоқ деген сөз емес. Олар өзіне жаманшылық жасаған кісінің өзінен де дұшпандық іздемейді. Жамандыққа жамандық қайтаруды ойламайды. Сондай-ақ өз кінәларын да мойындай алады. Кекшіл емес.
6.Бақытты адам сүйе де біледі. Бір ерекшілігі, өзімшіл адамдар өзін сүюді талап етсе, бақытты жан өзі біреуді сүйгеннен ләззат табады. Айырмашылығы осында. Үнемі өзін біреудің сүюін ойлап, соны ғана талап ету бірте-бірте адамды ауру қылады. Өйткені ол сүйген үстіне сүйе берсе, тек менікі ғана болса, бәрі мені ғана жақсы көрсе деген ойдың құрсауында қалады.
Ал, біреуді жақсы көруге ұмтылу, оны тек жақсылығын ғана көру адамды іштей байытады. Кейді тіпті мұндай адамдар махабатта жолы болмай, шынайы сүйіктісіне қолы жете алмаса да өздерін ұстай біледі. Оны сырттай сүйіп жүру арқылы да өздерін бақытты сезінеді.
7.Бақытты адам қайырымды келеді. Ол тек сырт көз үшін қайырымды көрінуге тырыспайды. Қайырымдылық, мейірімділік, имандылық оның барлық іс-әрекетімен қабысып, өріліп жатады. Содан да, құдай қолдап, ісі де берекелі болатын тәрізді.
|
