Ең алдымен баланың таңғы асты дұрыс ішуін қадағалау керек. Ол үшін кешке қарай балаңыздан таңғы асқа не жегісі келетінін сұрап алыңыз. Егер жағдайыңыз болса, оның өтінішін қанағаттандырғаныңыз дұрыс. Ал ең арзан әрі балаға күні бойы күш беретін ас-ботқа. Оны қарақұмықтан, күріштен, үнтақ жармадан, сұлу жармасынан болса да әзірлеуге болады. Олардың құрамына түрлі көкөністер мен жеміс-жидектерді үккіштен өткізіп қоссаңыз дәмі тіл үйірерліктей болмақ. Сондай-ақ таңғы асқа қайнатып пісірген тауық, сиыр еті, балық, жұмыртқа немесе омлет беру керек. Ал сусын ретінде шай, компот немесе какао берген дұрыс.
Кейбір балалар күн шықпай тамақтанғысы келмей, мектепке аш кетуге дайын тұрады. Ондайда жай сөзбен тым құрығанда аздан ішуін айту керек. Таңертеңнен дауыс көтеріп сөйлейтін болсаңыз, ол балаға кері әсер етіп, күні бойғы көңіл-күйінің бұзылуына себеп болады.
Сәскелік тамақты балалар мектептен жейді. Егер балаңыз асханаға бармайтын болса, оның тамақтануын өзіңіз ойлауыңыз керек. Сөмкесіне алма, банан, йогурт, 2-3 печенье, ішінде салындысы (начинка) бар бәліш, тәтті ақ ірімшік (сырок), нанның арасына ірімшік салып беруге болады. Бірақ нанның арасына шұжық пен піскен ет салуға болмайды. Сондай-ақ мектепте шоколад жеуіне тыйым салыңыз. Себебі шоколад жеген кезде баланың миы тоқ деген жалған ақпарат алады да, асқазаннан белсенді түрде сөл бөліне бастайды. Сөйтіп баланың тамаққа тәбеті жойылады. Екіншіден шоколад жеген баланың аузында тәтті орта пайда болады да, ол микробтардың көбеюіне жақсы жағдай жасайды. Сонымен қатар мектепте жеуге балаға банкідегі салатты беруге болмайды. Мектепте жейтін тағамының иісі қатты шығып тұрмауын да қадағалаңыз.
Есте ұстарлық бір жайт, баланың сабаққа апаратын тағамын қалай орап беретініңіз де маңызды рөл атқарады. Кітап, дәптерлері былғанып қалмас үшін салып берген тағамыңызды ас орайтын пленкаға орауға немесе пласмасса контейнерге салып беруіңізге болады. Бірақ оқушыға пленкаға орағаныңыз тиімді болмақ. Себебі олар көбінесе мектепте қолын жууды естен шығарып алады. Сондайда жейтін тамағын қолымен ұстамауына жақсы.
М. Жұмабек.
|
