Пайғамбарымыз (саллаллаһу алайһи уәссәллам) сыйлық мәселесіне ерекше көңіл бөлген. Өзара сыйлық берісуге шақыратын сүйікті Пайғамбарымыздың мынадай хадистері көп: «Бір-біріңізге сыйлық беріңіздер! Өйткені сыйлық сүйіспеншілікті арттырады, жүректі кірбіңнен тазартады»; «Сый-лық берісіңіздер, бір-бірлеріңізді жақсы көріңіздер»; «Жейтін нәрсе сыйлаңыздар. Бұл несібелеріңізді молайтады»; «Бір-бірлеріңізге барып қал-жағдай сұрасып тұрыңыздар. Сыйлық берісіңіздер. Өйткені зиярат-сүйіспеншілікті нығайтады, ал сыйлық-жүректі жамандықтардан (өшпенділік, қатыгездік, дұшпандық) арылтады».
Пайғамбарымыз өз өмірінде садақа алмаған, ал сыйлық берілсе алатын болған. Алыс-жақын ел-жұрттан үйіне әкелген заттарды көргенде, оның садақ я сыйлық екенін сұрап, егер сыйлық болса оны қолданатын, ал садақа болған жағдайда оған тимей кедей-кепшіктерге таратқызатын. Бірқатар хадистер Пайғамбарымыздың өзіне сыйлық жібергендерге оның да сыйлық жіберетіндігін айтуда. Тіпті көбіне одан артық қылып сыйлық жасайтын болған.
Пайғамбарымыз (саллалаһу алайһи уәсәллам) сыйлық әкелінгенде, оларды өзі де қолданатын, жақындарына, мұқтаж мұсылмандарға таратып беретін. Егер сыйлық басқаларға да таратуға келсе, оны сол жердегілерге тарататын. Былай дейтін: «Егер біреуге бір сыйлық жіберілген кезде, қасында басқа адамдар болса, олар бұған ортақ»,-деген.
Қазақстан мұсылмандары діни басқармасы 2010 жылға арналған күнтізбе жинағынан 530 бет
|
