-Өнеріңізді бағалаймыз. Бірақ жеке өміріңіз туралы айта бермейсіз. Отбасыңыз бар ма?
-Бір қыз, бір ұлдың анасымын. Жолдасым жеке кәсіппен айналысады. Жарым отбасындағы өз билігімді өзіме берген. Берген ақшасын санап, төркініме бергенімді сөз етіп тергемейді. Керісінше, көмекке зәру адамдарға қол ұшын бергенімді қалайды. Айтыста айтылған сөздерді талқылап, бас қатырмаймыз. Моральдық, материалдық жағынан үнемі маған демеу болып келеді. Жалпы, ұсақ әңгімесі жоқ, беделді азамат. Ол кісінің қасында өзімді бақытты санаймын.
–Айтыста талай адуынды ақынды тілмен тістелеген жансыз. Сізге көңіл білдіруге жарыңыз жүрексінбей келіп пе еді? Ол кісімен қалай танысып едіңіздер?
-Өзінің айтуынша, айтысқа жаңа шығып жүрген күндерімде мені көріп, ерекше әсер алыпты. Сосын сырттай бақылап жүрген. Кейін моральдық тұрғыдан күйзеліске ұшырап, жаным қиналып жүрген кезде көмек қолын созып, бағыт беріп, демеу болды. Жас кезімнен өз нанымды өзім тауып жүрген адам болдым ғой. Бір күні әбден шаршап, өзімнің нәзікжанды әйел екендігімді ойлап, біреуге еркелегім, арқа сүйегім келді. Алғашында оны өзімнің туған ағамдай сыйлайтынмын бәрі ойламаған жерден болды. Оның бетімді жерге қаратпайтынын түсіндім де қосылуға келістім. Таңдаудан қателеспеген екенмін, жолдасым маған әрі әке, әрі жар, әрі дос бола білді.
-Үйде қанша ағайындысыздар?
-Өзімнен кейін Ардақ пен Арайлым деген екі сіңлім, Дархан деген інім бар. Қазір анам да, бауырларым да өз қамқорлығымда десем де болады. Кезімде олар көмек сұрағанда қол ұшын бере алмай, жерге қарап қала беретінмін. Сондай күннің бірінде ауылдағы бір апай: «Сенің мұндай атағыңнан не пайда? Ауылдағы апаңның жағдайын білеміз ғой»,-деп жүрегімді ауыртқан. Сол сөз есіме түссе әлі қиналып кетемін. Аллаға шүкір, қазір ешқайсысы менен көмек сұрамайтын дәрежеге жетті. Олардың аяғына тұрып кетуіне бір кісідей үлес қостым. Негізі, бәрі жолдасымның арқасында. Бірге туғандай болып бірге өскен нағашы бауырларымның есімі-Қанат, Бейбіт, Салтанат, Гүлнар. Олардың барлығы да үйлі-баранды.
|
