Сұрақ:
Мені қалай байысам деген сұрақ ойландырады. Соған өз кеңестеріңізді берсеңіздер екен.
Сәлима, Өскемен қаласы
Жауап:
Дәл осы сұрақ талайды толғандыратын шығар. Дегенмен екінің бірі бай бола бермейтіні де анық. Қысқаша айтқанда,бай болатын адам ғана бай бола алады. Неге дерсіз. Өйткені көп адам өз күшіне емес, мемлекетке асыраушысына, жұмысына, сәттілікке, жолы болғыштыққа сенеді. Ал адам өзінің материалдық жағдайын жасау үшін тыным таппай еңбектенуі, баюдың жолын іздеуі керек. Әсіресе бүгінгідей жағдайда істеп жүрген жұмысыңызға да сақтықпен қарап қою артықтық етпейді. Тұрақты болып көрінгеннің өзінде жұмыстың мынадай ойландыратын жақтары бар:
-Сіз ақшаны тек жұмыс жүріп тұрғанда ғана табасыз. Ал жұмыс тоқтаса, қалтаңызға түсетін ақша да тоқтайды.
-Жұмыста ақша табуға уақытыңыз көп жұмсалады.
-Табысыңыздың қанша болмағы жұмыс берушінің ұйғарымына байланысты, ол шектеулі. Сіз материалдық жағынан тәуелсіз емессіз. Жалданып жұмыс істеп жүрсеңіз, өлген-тірілгеніңізге қарамай еңбек етуге мәжбүрсіз, әйтпесе табысыңыздан айырылып қаласыз.
-Ал, жалпы, қалай баюға болады деген сауалдың жауабын табу аса қиын емес. Ол мынадай: Байлар ақша үшін жұмыс істемейді, олар ақшаны өздеріне жұмыс істетеді. Олар ақшаны белгілі бір жобаға өте сауатты түрде салып, содан үстеме пайда көріп отырады. Яғни «ақшаны ақша табады».
-Қолыңызда миллион теңге тұрып, одан ешқандай пайда көре алмауыңыз да мүмкін, керісінше он мың теңге бүкіл байлықтың негізі болып жататын кездері де аз емес. Ақшаға байланысты ырымдарды сіз де жасап көріңіз, бәлкім сіздің де қалтаңыз қалыңдар...
-Ақшаны ешқашанда үстел үстіне қоюға болмайды. Сонымен қатар, кілтті, машинаның кілтін үстелдің үстіне қоюға болмайды. Дастарханның үстін қолмен сыпырмаңыз, міндетті түрде шүберекпен сүртіңіз, әрі қиқымды қолға емес, ыдысқа салу қажет. Бұл қағидаларды үнемі ұстаныңыз, әрі қаржылық жағдайыңыздағы өзгерісті де бақылауды ұмытпаңыз. Күн батқаннан кейін ақша санамауға тырысыңыз. Егер санауға тура келсе, оны біреуге жасатқаныңыз жөн.
-Бай, қалталы адамдардан қолма-қол ақша алуға тырысыңыз.
Ендеше, ойланып көріңіз, балаларыңыздың құлағына осыны құйыңыз. Ақша табудың жолын білген адам ештеңеден тарықпайды. Оның көңілі тоқ, қажетін табуы оңай. Ақшаңыздың көп болуын қаласаңыз, осы жайларды есте ұстаңыз.
("Керек кеңестер" №22 2011жыл)
|
