Ақпарат құралдарынан жеткен деректерде естілмеген жәйіттер толып жатыр.
Мәселен, Австарияға көшіп келгісі келетіндерге бұл бесінші құрылықтың өкімет орындары басқадай талаптармен қатар артық салмақтан арылу жөнінде талап қояды. Жергілікті медиктер етженді адамдардың әр алуан ауруларға шалдығу хаупі көбірек деп санайды. Қоныс аударып келгендерді емдеп жазу секілді машақатты ешкім де міндетіне алғысы келмейді; мұның өзі қымбатқа түседі; әрі елдің өз аурулары да жеткілікті деп есептеледі.
Салмағы артық адамдарды Австралияға тіпті дені сап-сау болып келсе де қоныстандырмайды. Осындай адамдардың бірі ағылшын әйелі Алисон Джонс елдің радиосының тілшісімен әңгімесінде бастапқы келгенінде салмағы бойы мен жасына орайлас оңтайлы деген шамадан 27 кг ауыр болып шыққанын, содан бері жылға жуық уақыт ішінде жиырма келідей жеңілдеп, енді жеті келі ғана артық болып тұрғанын айтты. Джонс жергілікті өкіметке деген өкпесінде жасырған жоқ. Бұл орайда кемсітушілік бар, дейді ол, өйткені ауруға шалдығу қатері анағұрлым көбірек арық эмигранттарға мұндай талап қойылмайды ғой.
Джонстың сөзінің әрине, қисыны бар. Бірақ өкімет орындары «қатаң болса да, заңның аты заң» деген ежелгі римдік нақылдан асатындай сыңай білдіріп отырған жоқ.
|
