Таяуда журналда халық қаһарманы, генерал лейтенант Бақытжан Ертаевтың толғаныс ойлары жарияланды. («Жұлдыздар отбасы, №17, 2012 ж») Әйгерім Сейфолла, Рысбек Үркімбай әзірлеген екен. Ол «Сырласу» атты айдармен беріліпті.
«Ең үлкен қателігім-анама жақсылық жасай алмадым» деп аталады. Солай десе де атақты азаматтың үлгілі өмір жолы тағылым аларлық. Қайырымды екенін көрсетерлік үзінді оқыңыздар.
-«Бір кісі таққа мінсе, қырық кісі атқа мінеді» деген қазақтың сөзі бар ғой. Мен сол өзімнің көптеген жерлестеріме де көмек бере алмадым. Өзім ауылға барған сайын марқұм әке-шешеме Құран оқытып тұрамын. Осыдан бес жылдай бұрын бір барғанымда сондай бір басқосуда ауылдың бір ақсақалы Жолтай деген атамыз қолын жайып: «Бақытжан деген генерал бізге мешіт соғып береді, әумин!»-деп бетін сипады. Енді ол ойлаған шығар, генералдың ақшасы көп деп. Қайдан білсін?! Бір-екі жылдай әлім келмей жүрді. Содан кейін марқұм баламды-бәрін жинап алып, мен осындай елге уәде беріп едім деп ойымды айттым. Балам барып мәшинесін сатты. Ауғандық жігіттер, өз туысқандарым көмек берді. Сөйтіп, жүз елу адам сиятын мешіт салып бердік. Сол мешіттің ашылуына құдайы тамақ беріп жатқанбыз. Мешіт салынды, енді маған рахмет айтатын шығар деп ойлағанмын. Сол жерде әлгі Жолтай атамыз қолын жайды да: «Генералымыз енді бізге көпір соғып береді, әумин!»-деп бетін сипады. (күлді).
-Көпірді соқтыңыз?
-Көпірді де соғып бердім. Оны да аштық. Одан кейін үшінші бір барып отырғанда, «Бақытжан, ауылдың атын Қаһарман деп қойғалы жүр едік. Мына елдің тілегімен, ниетімен Ертай ауылы деп атайын деп жатырмыз. Себебі әкең он сегіз жыл осы колхоздың бастығы болған» деп ойларын айтты. Сөйтіп қазір Ертай ауылы аталады. Әкемнің аруағы бір аунаған шығар.
|
