Сұрақ:
Көпке танымал «Көк тудың желбірегені» атты өлең сөздерін сіздер жібердіңіздер. Енді сол өлеңнің авторы жайында білгім келеді.
Нурасыл, Өскемен қаласы.
Жауап:
Алмас Ахметбекұлы, ақын:
-1992 жылдың 22 мамырында Алматыда тәуелсіз еліміздің көк туын қабылдап, Президент туды тізерлеп тұрып сүйгенде Шәуешекте арнайы жиналып теледидардан тамашалап отырған біз ерекше тебіреніп, көз жасына ерік бердік. Ішімізде Исмар деген дүнген жігіт бар еді, қарасақ, ол да жылап отыр. «Сендердің жылағандарыңды көріп шыдай алмадым»,-дейді.
Тудың өзін «Қорғас» шекарасынан елге өтіп келе жатқанда көрдім. Жел соғып тұрған, самал желмен көк туымыз да шалқып, әуелей желбіреп тұрды. Бойымды ерекше бір сезім билеп, көкейіме «Көк тудың желбірегені» деп басталатын өлеңнің бірінші шумағы келді. Алматыға келген соң жырдың қалған шумақтары туды. Кейін Еркін Ергенұлы деген жігіт бұл өлеңіме ән жазды. Бірақ әні менің көңілімнен шықпады. Сосын өзім Ермұрат Зейіпханұлына осы өлеңге ән жаз деп ұсыныс жасадым. Ол екі ән жазып әкелді. Біздің үйде фортепиано тұратын, үш қызым бірдей ойнайды ғой. Бір әні ұнап, Ермұратқа әннің байғазысына «Лирика» деген беларустің фортепианосын бердім.
Сұхбаттасқан Жанар Қойлыш («Жұлдыздар отбасы», №8, 2012 жыл)
|
