Австрия ғалымдары бір тың жаңалық ашты. Олар 1000-ға тарта ер азаматқа тәжірибе жасау нәтижесінде күннің ультракүлгін сәулесінің жыныстық қуатқа пайдасы мол екеніне көз жеткізгендерін мәлімдеп отыр.
Тәжірибеден өткен адамдардың үштен бір бөлігі ағзасында Д дәрумені жетіспейтіндер болған. Ал мұның еркек ұрығының қабілеттілігіне зияны бар екен, яғни ағзада ультракүлгін сәуле арқылы түзелетін бұл дәрумен тым аз болса, онда еркек әйелді ұрықтандыра алмауы мүмкін. Өйткені Д дәруменінің аздығы сперматозоидтардың қозғалғыштығы кемуіне себеп. Сондықтан еркектер ульракүлгін сәулені жиірек қабылдап тұруы керек дейді ғалымдар.
Д дәрумені сондай-ақ балық етінде, жұмыртқада кездеседі. Олай болса, ұрық қабілетсіздігінен зардап шегетіндер күн сәулесін жиі қабылдаумен қоса осы азық түрлерін де молырақ пайдаланғаны жөн екен. Әрине, емделуші мұның бәрін де дәрігер кеңесімен, соның бақылауында жасағаны дұрыс болмақ.
(«Ауырмаңыз!» № 21 қазан, 2011ж.)
|
