Израйль дәрігерлері отбасында бақытты ер адамдардың суыққа бой алдырмайтынын, қан айналымы қалыпты болғандықтан үйінде жанжалы көп ерлерге қарағанда жүрек сырқаттарына 64 пайыз аз шалдығатынын анықтапты.
Бұл зерттеуге 10 мың ер адам қатысқан. Оларды 1965-ші жылдан бері, яғни 46 жыл бойы бақылаған түрлі дәрігер-мамандар ақыры бір қорытындыға келді. Зерттеушілердің деректеріне сенсек, бақытты ер адам семіздікке, қан қысымына да басқаларға қарағанда екі есе аз шалдығады екен.
Жарты ғасырға жуық зерттеуін осылай ғана қайырған израйльдіктердің пікіріне Тель-авив оқымыстылары да қосылатынын айтты. Олар мемлекеттік қызметте істейтін 10.059 ер адамның денсаулығын тексерген. Сөйтіп түрлі себеппен ажырасқан, қазіргі күнде жалғызбасты ер адамдардың денсаулығы өзгелерге қарағанда мәз емес екеніне көз жеткізіпті. Жалғызбасты еркектерде созылмалы бүйрек, бауыр аурулары, асқазан жарасы өте жиі кездеседі екен. Ал өзін бақытты санамайтын ер адамдардың 80 пайызын жоғары қан қысымы мазалайды. Олармен салыстырғанда отбасында жайлы сезінетін ер адамдардың қызметі де, жалақысы да, денсаулығы да тәуір болып шыққан.
«Бұдан шығатын қорытынды мынау: ер адамдарға жалғыздық жақпайды. Жалғыздықтан олар қаңғыбастық өмірге бейімделеді, уақтылы тамақтанбай, асқазанын ауыртады. Ал отбасында бірлік болмаса қаны басына шапшиды. Яғни еркектердің құтқарушысы да, жауы да-әйел»,-дейді профессор Ури Голдбурт.
Н. Нұрсұлтан.
(«Ауырмаңыз! №14, шілде, 2011ж»)
|
