 Мерзімді баспасөзде, әсерлеп, бейнелеп сөйлейтін сөз саптасында мақтаның "ақ алтын", мұнайдың "қара алтын" деп аталатынын білеміз. Бұл бейнелі атаулардың бір ұшы алғашқы бесжылдықтар кезіндегі "көмір-өнеркәсіптің наны" деген жаттанды сөзге барып тірелетін болар. Ал шынында осы "алтындардың" дүниежүзілік нарықтағы бағалары қандай арақатынаста екенін екінің бірі біле бермес. Сол тұрғыдан айтқанда, дүниежүзілік нарықта "ақ алтын" дейтін мақтаның бір тоннасының бағасы мың-мың екі жүз доллар шамасында. Мақтаның бір тоннасы тоғыз-он тонна мұнайдың бағасына тең екенін білгеннен соң, "ақ алтынның" "қара алтыннан" он есе қымбат екеніне көзіміз жетеді.
Ал "сары алтын" деп атап, нақты алтынның өзін айтсақ, оның әр елдегі бағалары әр түрлі. Осы әр елдегі бағалар Лондон биржасында күнбе-күн тіркеліп, ортақ бір қорытынды баға шығарылып отырады. Шетелде біздегідей грамм емес, 31 грамға тең унция деп аталатын өлшем қолданылады. Сонда әлемдік нарықта ешқандай қоспасы жоқ таза алтынның бір унциясының бағасы 370-390, бір граммның бағасы 12-13 доллар шамасында өзгеріп отыратын болып шығады. Енді осының бәрінен соң алғашқы сұрағымызға оралсақ, оған "сары алтын" "ақ алтыннан" он мың есе, "қара алтыннан" жүз мың есе қымбат тұрады деп мөлшерлі жауап беруге болады.
|
