 Ал енді «Қаражорғаның» мына мәтінімен танысып көріңіздер. Бір өтініш блог оқудан қашықтау жүретін үлкендерге өздеріңіздің танып жүргендеріңіз туралы айтып, ой бөлісіп отырсаңыздар, бұларыңыз олардың да жүрегін қуанышқа бөлейтіні анық...
Қаражорға
Қаражорға болмаса, бидің сәні келе ме,
Қос етек көйлек кимесе, қыздың сәні келер ме.
Ал қанекей жолдастар, біреуің шық той бастар,
Той дегенде дейді екен, домалайды қу бастар.
Ал халайық билеңдер, билеңіздер сүйгенмен,
Басыңыздар шаттанып, қаражорға биіне.
Қозсың барлық бейнеңе, қан тарасын денеңе,
Қаражорға болмаса, тойдың сәні келер ме.
Қаражорға ойнаңдар қой десе де қоймаңдар,
Қос жүректің шаттағын дәл осылай тойлаңдар.
Келе бермес ыңғайда, дәл осындай күн қайда,
Ойнаңыздар жамағат, билеңіздер мұндайда.
Шалдар жүрсе шаттанып, жанарынан от жанып,
Би билесін мұндайда, кемпіріне мақтанып.
Кемпір жүрсін келкілдеп, ақ жайлығы желпілдеп,
Шалдарына көз қысып, би билесін селкілдеп.
Биле жеңгем билегім, мына тойдың гүлі едің,
Ағалардың қалайда, дір-дір еткіз жүрегін.
Салауатты ағасы, азаматтың сарасы,
Билеп жатқан селкілдеп, келіншектерге қарашы.
Биле-биле жігіттер, жанып тұрған үміттер,
Шыққанынша тоқтама, маңдайынан тұнық тер.
Биле қыздар бұралып, сауық сайран құратын,
Жауласын бір от сезім, жүректерге сұрапыл.
Қыздар солай маздасын, жүрек кілтін қозғасын,
Қозған кезде жігіттер, талып тізе жаздасын.
Ғашықтарға тіл қатып, жүректерге жыр қатып,
Қыз бен жігіт қосылып, билеу деген бір бақыт.
Биле-биле сұлуым, қандай жарқын күлуің,
Сыртылдасын саусағың, бүлкілдесін бүйірің.
Анау тұрған бозжеткен сүйкімді еді-ау ой неткен,
Талайлаған жігіттің жүректерін сөйлеткен.
Қаражорға болмаса, бидің сәні келер ме,
Қос етек көйлек кимесе, қыздың сәні келер ме.
Ал қанекей жолдастар, біреуің шық той бастар,
Той дегенде дейді екен, домалайды қу бастар.Фото: Телеканал КТК
|
