Жыл басы Наурыз әр отбасына береке-бірлік, денсаулық, молшылық, елімізге тұрақтылық әкелсін дей отырып, бүгінгі айдарымызда осы мезгілдің тынысына орай жазылған туындыларды назарларыңызға ұсынбақпыз. Оның біріншісі әйгілі ақын А. Нұрбаевтың қызы Гүлнәрға арналған өлеңі, екіншісі-жас талапкер ақын М. Төктебайұлынікі.
А. Нұрбаев
"Сегіз аяқ"
(Қызым Гүлнәрға арнаймын)
Келтіріп сазын,
Толтырып назын,
Көңілдің көркін басқандай.
Құйқылжып барып,
Құйылып талып,
Төгілтіп маржан шашқандай.
Тіл менен жақтың арасы-
Сиқырлы үннің сабасы.
Шарықтап шалқып,
Дірілдеп қалқып,
Қанатын желге қақтырмай.
Мамырлай кейде,
Түскендей бейне,
Көлге қонған аққудай.
Ериді денең, балқиды
Қиялдар билеп әр қилы!
Жаңбыры, қары,
Мұңы мен зары,
Күлкісі, назы аралас.
«Біргенге маржан,
Білмеске арзан».
Қажетіне жарамас.
Айналайын асқақ ән,
Алқалы топты бастаған.
Қисыны қиын,
Қиылған түйін
Тоқсан сөздің тобықтай.
Басылмас қыры,
Ашылмас сыры,
Айтушысы жолықпай.
«Толғауы тоқсан тілі бар»
Осы бір әнді ұғып ал!
Үзілген сайын,
Үркердей айың.
Таусылар тағат, сабырың.
Шымырлап иіп,
Сыбырлап ұйып,
Алпыс екі тамырың.
«Құлақтан кіріп бойды алған»
Осындай кімнен ән қалған?!
Айтушы ек бір күн,
Сүюші ек шіркін,
Абайдың сегіз аяғын.
Қалды ма енді,
Айтуға жөнді
Баяғы дауыс, баяғы үн.
Сұрама, мейлі, сұраңыз,
Абайдан қалған мұрамыз.
Ұйытып көпті,
Құйылтып епті.
Ән салу деген бір дарын.
«Домбыра сазы-
Жақсы әннің жазы»
Деген сөз бар Гүлнәрім,
Келгендей Абай қайта бір,
Осы әнін оның айта жүр!..
М. Төктебайұлы
"Аңсаумен жүрмін өзіңді"
Сәулежан, алғашқы кез жүрдің тұйық,
Көрсем болды, қараймын ішім ұйып,
Білмеймін неге екенін, айтуға ұят,-
Қарасам қалатындай көзім тиіп.
Болады жолдың ұзын, қысқасы да,
Айтпағымның жай әншейін нұсқасы да,
Ала кепсің кең дала таза ауасын,-
Түсті есіме жайлауы, басқасы да.
Сезімнің кәрі-жасы болмайды екен,
Құнттаса еккен гүлің солмайды екен.
Өзіңе қарап тұрып қысыламын,-
"Мұндайда қай періштем қолдайды екен?"
Тұрған бойың мап-майда инабатты,
Көрінесің өзіме қиын тәтті,
Үрке қарап, жүз тайдырып жүрген едің,-
Өзіңменен тілдесер таптым сәтті.
Алғашқы сөзім еді, айып етпе,
Неде болса айтып қалдым тура бетке,
"Күліп-ойнап жүргенге бұл жалғанда,-
-Не жетсін",-дейді ақын қалың көпке.
Ойлаймын, сақтамассың бұған өкпе,
Еш нәрсе жазылмайды тектен текке.
Ақылың сезіліп тұр ажарыңнан,-
Сондықтан, айналайын, қатты сөкпе.
|
