Сұрақ:
-Біздің апамыз сексенге жақындап қалды. Ылғи алда жүру әдеті: «Той домалақта кемпір-шалдардың жатталған тілеулері әбден жалықтырды. Алдарыңдағы компьютеріңнен қараңдаршы, сирек айтылатын баталар бар шығар, жаттап алып айтып жүрейін»,-дейді. Осыған көңіл бөлсеңіздер екен!
Назым, Нұрлан, Өскемен қаласы
Жауап:
-Назым, Нұрлан және басқа да жастар!
Соңғы техникаларда селқостау үлкендерге тілектерін орындап жүргендерің өте дұрыс. Сондай-ақ, олар сұрамаса да соларға қызықты-ау деген «жәйіттерді» оқып беріп отырғандарың жақсы-ақ болар еді дер едік.
Төменде апамызға арнап екі бата-тілектер беріп отырмыз...
Қосылып тұрған қос ұлан,
Игілікті, алаулы болыңдар,
Халыққа қалаулы болыңдар.
Мейірбанды махаббатпен,
Мейірлі мархабатпен,
Үлкендерді сыйлаңдар,
Өкпеге де қимаңдар!
Құрметті той иесі,
Ісіңді тағдыр оңдасын,
Қайда жүрсең қолтықтап,
Қызыр бабаң қолдасын!
Денеңде дерт болмасын.
Тойың тойға ұласып,
Жан-жүрегің толғансын.
Күннен-күнге көбейсін,
Дос-жараның, жолдасың,
Бақытың тассын әманда,
Бергенін тәңірі алмасын!
Өміріңді ұзартып,
Балаң менен шөберең,
Шөберең мен шөпшегің,
Туажаттар жалғасын!
|
