Мамандықты дұрыс таңдау адамға өзінің шығармашылық қабілеттерін жүзеге асыруға, өзі мен отбасы мүшелерін асырауға және ертеңгі күніне сенуге көмектеседі. Қандай таңдауды дұрыс деп айтуға болады?
Біріншіден, болашақта істейтін жұмыс қуаныш әкелгені дұрыс.
Екіншіден, жасөспірім осы жұмысқа қажетті маңызды қабілеттеріне: интелектуалды, физикалық, психологиялық жағынан сай болуы және оны істей алуы керек.
Үшіншіден, еңбек нарығында бұл мамандықтың түрі сұраныста болса жақсы.
Баланың мамандық таңдауына белгілі бір дәрежеде ата-анасы да ықпал етеді. Сондықтан ата-аналардың мына кеңестерге құлақ түре жүргені жөн:
Әрбір ата-ана баласының болашағы мамандықты дұрыс таңдауға байланысты екенін есте ұстасын. Баланы бақылай отырып, келесі жағдайларға назар аударғаны жөн. Олар: қажеттілік, қабілеттілік, қызығушылығы, бейімділігі, мінез-құлқындағы ерекшеліктер.
Балаңызбен бірлесе отырып, өзіңіз тұратын аймақта қажетті мамандық түрін анықтаңыз.
Сол аймақтағы оқу орындары туралы ақпарат жинаңыз. Балаңызға кеңес айтып, дұрыс жолға бағыттауға көмектесіңіз. Және де өз қалауыңызды емес, баланың таңдау жасауына жол беріңіз.
Кейбір ата-аналар балаларын өздері ұстанатын көзқарасқа бағынуға мәжбүр етеді. Ол дұрыс емес, себебі балаңыздың өз қалауы болады.
Кейбір мамандықтар, мысалы, өнер ерекше қабілеттік пен дарындылықты талап етеді. Ондайды баланың еркінен тыс таңдауына жол бермеңіз.
Ешқашан балаңызды басқа балалармен салыстырмаңыз. Адамдардың бір-бірінен жеке тұлғалық қасиетімен, сондай-ақ бойының ұзын-қысқалығымен, көз жанарының түсімен ерекшеленетіні белгілі, сондай-ақ жетістіктері де бірдей болмайды.
|
