Төле би қатты дертке ұшырап, төсек тартып жатқан ауыр күндері Қаз дауысты Қазыбек би науқастың бас жағында, Көкі би, Мәлік би мен Ержан би аяқ жағында отыр екен. Үйге сәлем беріп жақсы киінген қару-жарақты үш қария кіріпті. Біреуінің көзі қылилау, екіншісі қасқа бас, үшіншісі доғал тұмсық екен дейді. Әлгілер Төле биге: «Үшеуіміз үш жүзден көңіліңізді сұрай келдік. Қазақ сорлының ендігі бақыты қайда, ардақты еліңізге қандай өсиет-өнеге айтып қалдырасыз?»-депті пысықтық танытып доғал тұмсық.
Сонда Төле би басын көтеріп:
Жүзге бөлінгендердің жүзі қара,
Руға бөлінгендердің құруға асыққаны.
Атаға бөлінгендер адыра қалады,
Көпті қорлаған көмусіз қалады.
Хан азса халқы сатады,
Халық азса хандыққа таласады,-
депті де «Қазақ бақыты бұрын өзара достық, бірлік, ынтымақта болатын еді, ендігі жерде қазақ бақыты: «Таздың басында, соқырдың көзінде, пұшықтың мұрнында қалып тұр» депті.
|
